മഞ്ഞക്കിളിയുടെ മൂളിപ്പാട്ടുണ്ടേ......

Hearty welcome to my blog

ഒരു ബ്ലോഗ്‌ തുടങ്ങണം എന്നത്  എന്റെ  വളരെക്കാലത്തെ ആഗ്രഹമാണ് ( നിങ്ങൾ ഇപ്പൊ ചിന്തിക്കുന്നുണ്ടാകും തോല്ലയായല്ലോ, ഇവനും തുടങ്ങിയോ ... നോ പ്രോബ്ലം .. ഒരു തെറ്റായ ചിന്ത ഏതു പോലീസു കാരനും പറ്റും ... ഞാൻ ക്ഷമിച്ചിരിക്കുന്നു ...)

എന്ത് എഴുതണമെന്നു ഇപ്പോഴും ഒരു പിടിയുമില്ല ..... :) ചിലപ്പോ ഒരു കഥ.... ഒരു കവിത(എന്റെ പൊന്നേ  അതു വേണോ)....സിനിമ... അല്ലെങ്കിൽ ചില തൊലിഞ്ഞ അനുഭവങ്ങൾ ( അതു ഇഷ്ടം പോലെ ഉണ്ടല്ലോ...) ഇതൊക്കെയാ എന്റെ മനസ്സില്. അല്ലെങ്കിലും പ്ലാൻ ചെയ്യാൻ മാത്രം  ഞാൻ പണ്ടേ മിടുക്കനാ...

ആരെങ്കിലും ഇത്  വായിക്കുമോ, ആർക്കെങ്കിലും ഇഷ്ടപ്പെടുമോ എന്നൊക്കെ ചിന്തിച്ചിട്ടുണ്ട് . അപ്പോഴൊക്കെ എന്റെ മനസ്സിൽ ആദ്യം എത്തിയത്  കന്മദം എന്ന ചിത്രത്തിലെ സീൻ ആണ് . ലോഹിതദാസിന്റെ തൂലികയിൽ നിന്ന് അടർന്നു വീണ മനോഹരമായ ഒരു രംഗം .

ചെറു പാറക്കൂട്ടങ്ങൾ അങ്ങിങ്ങായി കിടക്കുന്ന ആടിനെ മേയ്ക്കുന്ന സ്ഥലത്ത്  ഒരു സായാഹ്ന്നം ചെലവിടാൻ എത്തിയതാണ്  മുത്തശ്ശിയും വിശ്വനും (Mohanlal). മുത്തശ്ശി ചെറുമകൻ ദാമുവുമായി(Siddique)  വന്നിരിക്കാറുണ്ടായിരുന്ന  സ്ഥലം . അതുകൊണ്ട് തന്നെ ആ ഓർമ്മകൾ തികട്ടി വരുന്നുമുണ്ട് . അത് വിശ്വനുമായി പങ്കുവെച്ചപ്പോൾ ആരോരും ഇല്ലാത്ത വിശ്വന് അത്  തികച്ചും പുതിയൊരു അനുഭവമായിരുന്നു .

തന്നെക്കുറിച്ചും ഇതുപോലെ ഓർക്കാൻ ആരെങ്കിലും ഉണ്ടായെങ്കിൽ എന്നാശിച്ചു പോകയാണ് അയാൾ . വിശ്വൻ പറയുന്നു .

“എനിക്ക്  കൊതി  വരുകയാ .. എനിക്കിങ്ങനെ ഓർക്കാൻ  ആരുമില്ല … ഉള്ളതു തന്നെ ഒന്നും നല്ലതുമല്ല . ആർക്കും വേണ്ടാത്ത ആരോരും ഇല്ലാത്ത ഒരു ജീവിതമാണ്‌ . ചാവുമ്പോ പോലും ഒരു തെരുവ് പട്ടി ചാവണ പോലെ “

“എന്തൊക്കെയാ ഈ ചെക്കൻ പറയണേ.... എല്ലാരും ഈ ലോകത്തേക്ക് ഒറ്റയ്ക്ക്  തന്നെയാ വരുന്നേ .. പിന്നെയാ എല്ലാവരും ഉണ്ടാവണേ.. നാട്ടിൽ അമ്മേം കൂടപ്പിറപ്പും  ഉണ്ടെന്നല്ലേ  പറഞ്ഞത് “

“എല്ലാരും ഉണ്ട് .. പക്ഷെ ആരും ഇല്ലാത്തതു പോലെയാ … മുത്തശ്ശിക്കെന്നോട്   ശരിക്കും ഇഷ്ടാണോ .. ദാമൂനോടുള്ള ഇഷ്ടത്തിന്റെ ഇത്തിരിയെങ്കിലും “

കുമാരൻ  എന്ന നാട്ടിലെ പ്രധാന  ചട്ടമ്പിയെ വക വരുത്തിയ ആ വലിയ രൂപത്തിൽ നിന്നും വന്ന  അത്തരമൊരു നിഷ്കളങ്കമായ   ചോദ്യം മുത്തശ്ശിയെ നന്നേ ചിരിപ്പിച്ചു .

“ഈ  തടീം വമ്പത്തരമേ ഒക്കെ  ഉള്ളൂ..  വെറും കൊച്ചു കുട്ടികളുടെ പോലെയാ .. സൂര്യ ചന്ദ്രന്മാരെ ഇഷ്ടമില്ലാത്തവർ ആരെങ്കിലും ഉണ്ടോ .. പറ “

“ഇല്ല”

“ പൂക്കള് .. കിളികള്  ..പുഴ... പാട്ട് ...നല്ല കഥ ... നല്ല ചോറും കൂട്ടാനും ...നല്ലൊരു വീട്  അങ്ങനെ നല്ലതെന്തും എല്ലാവർക്കും ഇഷ്ടാ “

“ഞാൻ  നല്ലതാണെന്നാണോ  മുത്തശ്ശി പറയുന്നേ “

“നീ.. നീ എന്റെ ദാമൂനെ പോലെ തന്നെയാ എനിക്ക് “

തുടർന്ന്’  മനോഹരമായ ഒരു  ഗാനം ‘ മഞ്ഞക്കിളിയുടെ മൂളി പാട്ടുണ്ടേ’

സത്യമാണ്  നല്ലത് എല്ലാവർക്കും  ഇഷ്ടമാണ് . നല്ലതാക്കാമെന്ന വിശ്വാസത്തോടെ എന്റെ എല്ലാ സുഹ്രത്തുക്കൾക്കും സമർപ്പിച്ചുകൊണ്ട്  ഞാൻ ഈ ബ്ലോഗ്‌  തുടങ്ങട്ടെ .

മഞ്ഞക്കിളിയുടെ മൂളിപ്പാട്ടുണ്ടേ.... മനസ്സിനുള്ളിൽ മാരിക്കാവടിയാടും ചിന്തുണ്ടേ ..